 |
| Model Seductive Stare |
Mujhe aksar boys and girls contact karte hai kyunki unhe model banana hai. Ab kuch logo ko milke mera bhi mann karta hai ki inhe koi mauka dena chahiye. Par main khud film director hone ke bawajud bahot baar kisi ki chahkar bhi madat nahi kar pata. Aisa kyun?
Well, zyadatar jo mujhe contact karte hai unke pass koi previous work nahi hota dikhane ke liye. Woh yeh galat femi pal lete hai ki bina previous work ke koi bhi unhe select kar lega. By previous work, mera matlab hai koi sample ya demo. Jab main unse puchta hu "Pehle kuch kiya hoga toh uski link send kar dena" toh aksar unha reply aata hai "Pehle toh kuch nahi kiya lekin aap mauka doge toh kar sakte hai" . Ab yaha se meri problem shuru hoti hai. Internet ke madhyam se woh modeling tips sikh sakte the, unhone woh bhi nahi kiya. Kisi achhe photographer se achha portfolio bana sakte the khudke career ke liye unhone woh bhi nahi kiya. Sach bol raha hu bhai, 100 mein se 90 percent log jinko model banana hai woh youtube pe jake modeling ke basic tutorials tak nahi dekhte aur is ummeed mein rehte hai ki kisi din koi mauka de dega. Aise mein koi agar chance de bhi de toh sirf isliye dega ki uske pass tumhare alawa koi better option nahi hoga.
Ab kabhi kabhi mere pass in sabke liye kaam nahi hota lekin mere friend circle mein kuch filmmakers hai jo koi na koi music video, tv ad, short film ya feature film banate rehte hai aur unhe models ki zarurat padhti hai lekin main unse baat karke bhi in newcomers ko chance nahi de sakta. Kyun? Again, jab main apne friend se bolunga "Bhai ek ladki hai jisko modeling mein interest hai, koi kaam hai kya tere pass uske liye" toh mujhe reply milega "Ha bhai, ek music video shoot kar raha hu is week, us ladki ka portfolio send kar dena" . Ab main us ladki se contact karunga aur woh meri jaan le legi ulta mujhe samjhane mein ki cellphone ke photos se kaam nahi chalega kya. Ha meri maa, cellphone ke photos ko portfolio bol diya tune, ab modeling bhi mobile ke camera ke hi aage kar lena.
Itna samaj lo bhaijaan, jo khudke modeling career ke liye khudka ek sample khudke paise se nahi bana raha, usko kaam deke uske upar kharcha kaun karega. Jo khud itna serious nahi hai ki pehle kuch tutorials dekh lu online pe, kuch sikh lu fir dusra kyun apna samay barbad karke aise ko sikhayega. Overall number one reason hai ki koi tumhe as a model nahi hire karne wala kyunki bhalehi tumne pehle kuch nahi kiya lekin kum se kum tutorials dekhke, Ghar mein practice karne ke liye koi chance nahi lagta lekin log yahi bahana dete hai ki koi chance nahi deta.
Comments
Post a Comment