Agar Actor Banana Hai toh kabhi Ye Kaminepanti Try Karke Dekho : Caution ' My Opinions Are not Your reality So Your Negative Comments Are Neither Mine '

Kiske baap ne bola ki actor banane ke liye ek partner ki jarurat hoti hai jo aage ke lines bole? Mere bhaiyo , actor banane ke liye acting ke mood ki jarurat hai. Abhi mood hai acting karne ka? Agar ha toh tumhara next sawal hoga 'ok,kya dialogues bolne hai?' again, kis zhandu baam ne bola ki bina dialouge ke actor nahi ban sakte. Mujhe yaad aate hai woh din jab main is field mein ekdum new bole toh abhi abhi ande se nikla hua tha tab mujhe ye acting lessons aur techniques bade pakau lagti thi. Toh main practice ke liye ek hi chiz karta tha agar pasand aaye toh tum bhi try karo.

Roz apni ek friend ko call karne ka propose marne ka. Jyadatar ladkiyo ko pehle se malum tha ki prajakt kisike pyar mein padke propose marne se raha(woh kya hai ki kuch saalo pehle already ek bar ek ladki ne mere dil ko diwali ka fataka samajke fod diya bina machis ke) isliye sala koi yakin hi nahi karta tha. Fir ek hafte baad ek ladki ko sachmein laga ki main propose mar raha hu aur badmein har ladki yakin karne lagi. Kuch ladkiyo ka jawab tha soch ke batati hu, kuch ne ha kar di...main fir instantly unhe bata deta tha ki manjra kya hai. Bahot si friends galiya deti thi par friends thi, samaj gayi. Ye le, ban gaya main romantic actor.

Kai baar fir main dosto se party mein bhadak jata aur zhagda chalu kar deta, kuch friends haste the kyuki unhe pata chal jata tha ki main unka game le raha hu, kuch ne fir zhagdo ko seriously lena chalu kar diya. Ye le, ban gaya main angry young man. 

Ek baar maine apni bail gadi ke dusre chakke( meri gf) ko call kiya aur rona chalu kar diya ki main musibat mein hu tu aaja. Woh bhi 1000 km dur se aa gayi train pakad ke.Uske aate hi maine kaha ki "jaan, tere bina nahi ji sakta"..woh bhi rone lagi...ab khushi ke maare ki gum ke marein ki main musibat mein hu ye mujhe aaj tak nahi samjha,par rone lagi...ye le, ban gaya main devdas actor.

Bolna sirf itna hai, acting sikhne ke liye kam se kam mujhe toh bas mood chahiye, tumhe kya chahiye malum nahi. Par agar tumhare pass class lagane ke ya academy jane ke paise nahi hai toh bhaiyo aur unki beheno, uthao phone, lagao call, fekna chalu karo aur ban jao actor.