Canon 5D ka chutiyappa. Short Film ya Music Video Banane Ke Liye Mark ii ya iii Zaruri Hai Kya?

Posted by on

Yeh post un logo ke liye jo khudka short film ya Music Video banane ke liye Canon 5D kharidna chahte hai. Agar Camera kharidne ke baad bhi tumhare pass paise bachte hai kyunki tum ek amir baap ki aulad ho toh bindast kharido, yeh article tumhare liye nahi hai. Yeh post unke liye hai jin becharo ka budget 1 Lakh rupayo se kum hai.

Agar Short Film, Music Video ya Wedding shoot karne ke liye hi camera kharidna hai toh Canon 5D ke piche bhagna band karo. Yeh chize saste DSLR camera par bhi shoot ki ja sakti hai aur woh bhi professionally.

Kyun?

  1.  Agar Video Youtube, Facebook ya Fir TV pe jaane wala hai toh 1080p ka resolution is more than enough.
  2. Jyadatar DSLR ka Sensor aaj APS-C ya Full Frame hota hai aur maa kasam APS-C sensor bhi achhi quality deta hai.
  3. Maine apni feature film 'Lastbenchers' mein Canon 550D, 600D, 650D, 7D use kiye the but fir bhi theatres mein release huyi aur songs major TV channels jaise Zing., ETC, 9xm, Zoom  pe play huye the aur kisine complain nahi ki.
  4. Quality sirf camera pe depend nahi hoti chote, lenses bhi important role play karte hai. 5d Mark iv pe lagi zhadu lens ki quality 550D pe lagi prime lens ki quality se kum dikhegi.
  5. Zyadatar mehenge DSLR jab Photo mode se Video mode pe aate hai toh 12 mp wale ho ya 18 megapixel wale, woh ya toh 1080p mein shoot karenge ya 4k mein ya 720p mein etc. Kehne ka matlab tumhara camera bhalegi 32 megapixel ho, lekin video mode pe dalne par utne pixels use hi nahi hone wale.
  6. Jab tumhara short film ya music video banega aur kahani se leke shooting galat ki gayi ho toh RED EPIC pe bhi shoot kiya hota toh logo ko pasand nahi aai hoti.
Matlab Canon 5D mark iv ki quality baki APS-C sensor wale jaise canon 550D se kum hai?

Nahi mere bhai, Canon 5D baap hai lekin jo kaam bachho se ho sakta hai waha baap ko kyun bulana. Upar se baap ke kharche bhi bahot ho jaate.

Mera Bhai Sanket Galactus bollywood cinematographer hai aur woh Canon 5D lene ki sochta sirf isliye ki Usko jo events ke ya dusre Directors ke Kaam milte hai unki nazar mein Canon 5D mahol hai aur baki bekar. Aur sach batau, main jyadatar film directors se milta hu toh yahi pata chalta hai saalo ko camera ka ghanta koi knowledge nahi hota, bas char logo ke muh se sun liya RED pe shoot karenge toh RED choose karte, Sun liya CANON 5D pe shoot karenge toh 5D shoot ke liye book karte hai. Iska matlab yeh nahi ki yeh sab camere kaam ke nahi. Arey bhai yeh toh badiya camere hai hi lekin budget kum ho toh pura paisa sirf ek camera kharidne ke liye uda dena samajdari ki baat nahi.

Yeh post sirf unke liye jinhone suna hoga ki 5D aisa hai 5D waisa hai. Yaaro tension na lo, Koi bhi DSLR uthao aur shoot karna chalu karo. Aaj market mein 50,000 ke niche aise camera hai ki tumhari Short Film ya Music Video ya fir koi Documentary aaram se zabardast quality mein shoot ho sakti hai. CANON 5D ya koi bhi aisa camera jo 2 Lakh ke upar jaye woh tabhi kharido jab 2 lakh kharch karne par bhi tumhare pass 1 lakh bachte hai Baki saaman kharidne ke liye. Agar 1 Lakh ka budget ho toh depress mat ho darling, mere pass 1 lakh ka budget hota toh main yeh karta apne music Video ke liye.

Main 1 Lakh Rupaye Mein Kya Kharida Hota.

  1. Ek DSLR camera jiska budget 35,000 tak ho kyunki mujhe yakin hai ki achha cinematographer cell phone pe bhi jaadu dikha sakta hai aur ek chutiya RED DRAGON camera hath mein leke bhi hag dega.
  2. 2 Memory Card 16GB ke high speed wale. Woh slow speed wale cards lene ka chutiyappa main toh nahi karne wala.
  3. Ek 5000 rupaye ka Tripod.
  4. Ek Steadicam taki motion shots le saku.
  5. Ek 6 feet ya 8 feet wala DSLR slider.
  6. Ek 1 TB ki Hard Disk Data Store karne ke liye.
  7. 2 Lenses. Pehle toh 50MM 1.8 Aperture wali, uske bina toh apna kaam hi nahi jamta. Aur Dusri koi telephoto lens jaise 18-55.
  8. Baki paise petrol, sutta, beer aur card print karane ke liye ki bhai apun bhi cinematographer hai.
No Doubt 5D achha hai, achha nahi bahot achha hai lekin agar budget 1 lakh ka ho toh zhadu samjhe kya pure paise sirf ek camera pe lagau. In the end log video pasand karte hai, achhi story, achhe songs, achhe angles aur achhi editing. 5D pakad ke camera shake karne se better hai cellphone tripod pe chadake smooth shots lu. Aur jinke pass already Canon 5D hai woh khush raho, badiya camera hai bas ho sake toh camera aur lenses ki jagah cinematography ka pura khowledge lene pe dhyan do.



Location: Nagpur, Maharashtra, India

Comments

Post a Comment